Trajneri i Milanit, Ruben Amorim, raportohet se ka identifikuar edhe një tjetër lojtar të Manchester United si objektiv për afatin kalimtar të verës, vetëm pak ditë pasi klubi italian bëri një “qasje fillestare” për Mason Mount.

Amorimi, i cili u shkarkua nga Manchester Unitedi në janar, ka zëvendësuar Massimiliano Allegrin te kuqezinjtë, pasi Milani nuk arriti të kualifikohej në Ligën e Kampionëve pas përfundimit në vendin e pestë në Serie A.

Milani ka deklaruar se trajneri portugez do të sjellë në “San Siro” një “qasje moderne taktike dominuese”.

“E di saktësisht se çfarë përfaqëson ky klub: histori, prestigj dhe një bazë të jashtëzakonshme tifozësh në mbarë botën. Është një sfidë që e pranoj me krenari dhe entuziazëm,” tha Amorimi pas emërimit të tij.

Pas një sezoni kaq zhgënjyes, pritet që vera të jetë shumë e ngarkuar për Milanin, me disa lojtarë që tashmë janë lidhur me një transferim në klub.

Më herët gjatë këtij muaji, Nicolo Schira raportoi se Milanit i ishte ofruar mundësia për të transferuar Manuel Ugarten nga Manchester United, megjithatë dëmtimi i tij në ligamentin e kryqëzuar anterior (ACL) në Kupën e Botës e ka bërë pothuajse të pamundur një transferim këtë verë.

Javën e kaluar u raportua se Milani bëri kontaktet e para për transferimin e Mason Mount, për të cilin Manchester Unitedi kërkon vetëm 25 milionë euro (21.5 milionë funte), sipas gazetarit Daniel Speranza.

Ndërkohë, të hënën në mbrëmje doli në pah se Amorimi dëshiron të transferojë edhe një mbrojtës qendre përpara sezonit të ri, me dy emra që janë përmendur.

Sipas Antonio Vitiello, Gonçalo Inácio i Sporting Lisbonës është një nga mbrojtësit për të cilët Amorim është “i çmendur”, ndërsa në listën e dëshirave të tij ndodhet edhe Lisandro Martinez.

Madje, thuhet se tashmë janë zhvilluar kontakte lidhur me një marrëveshje të mundshme.

Martinezi kaloi një pjesë të madhe të sezonit të kaluar jashtë fushave pasi pësoi një këputje të ligamentit të kryqëzuar anterior në shkurt të vitit 2025, një dëmtim që e mbajti larg futbollit për 10 muaj.

28-vjeçari, i cili iu bashkua Manchester Unitedit nga Ajaxi në vitin 2022 për rreth 57 milionë funte, zhvilloi 19 paraqitje në të gjitha garat sezonin e kaluar, por përtej kësaj ai ka qenë një nga lojtarët kyç të skuadrës në “Old Trafford”.

Në dhjetor, pasi Manchester Unitedi mposhti Newcastle me rezultatin 1-0, Amorimi e kishte vlerësuar lart Martinezin.

“Ai është një djalë me shumë karakter,” tha Amorimi.

“Është shumë i mirë me topin. Është mësuar me presionin dhe e tregoi edhe sot se është një lojtar i nivelit më të lartë”, tha ai.