Prokuroria Themelore në Prizren, Departamenti për Krime të Rënda, ka ngritur aktakuzë ndaj tre personave: N.I., E.M., dhe H.H., të cilët ndodhen në paraburgim që nga muaji mars 2025, nën dyshimin për kryerjen e veprave penale të lidhura me narkotikë dhe armëmbajtje pa leje.

Sipas aktakuzës, të pandehurit dyshohet se kanë kryer veprën penale “blerja, posedimi, shpërndarja dhe shitja e paautorizuar e narkotikëve” si dhe “mbajtja në pronësi, kontroll ose posedim të paautorizuar të armëve”, transmeton lajmi.net.

Hetimet zbulojnë se më 28 shkurt 2025, N.I. kishte shitur rreth 1 kg marihuanë për 2,400 euro në afërsi të fshatit Landovicë, Prizren. Ndërsa më 7 mars 2025, në bashkëveprim me E.M. dhe H.H., ata tentuan të shisnin mbi 10.5 kilogramë marihuanë në vlerë rreth 25,000 euro, ku u arrestuan në flagrancë nga Policia e Kosovës. H.H. kishte arritur të ikë në momentin e bastisjes, por u arrestua disa ditë më vonë.

Gjatë bastisjes në shtëpinë e të pandehurit N.I., autoritetet kanë sekuestruar edhe rreth 1.2 kg marihuanë, një armë zjarri, fishekë, pajisje për pastrimin e armës, peshore digjitale për peshimin e drogës dhe 3,965 euro, që dyshohet të jenë përfituar nga shitja e narkotikëve.

Gjithashtu janë sekuestruar edhe dy vetura të përdorura në veprimtarinë kriminale: një Audi dhe një VW Bora.

Prokuroria ka propozuar që të gjitha mjetet e sekuestruara dhe pasuritë e fituara në mënyrë të kundërligjshme të konfiskohen me vendim përfundimtar nga gjykata.

Aktakuza tashmë është dorëzuar në gjykatë dhe prokurori i çështjes ka kërkuar që të akuzuarit të shpallen fajtorë dhe të dënohen sipas ligjit./lajmi.net/