Një person është arrestuar në rajonin e Prizrenit nën dyshimin për përfshirje në një rast të krimit kibernetik, pas një aksioni të përbashkët të Policisë së Kosovës dhe Prokurorisë Speciale të Republikës së Kosovës, i zhvilluar në bashkëpunim me autoritetet e Shteteve të Bashkuara të Amerikës.

Sipas një komunikate të përbashkët të Policisë së Kosovës dhe Prokurorisë Speciale, aksioni është realizuar nga Drejtoria e Hetimit të Krimeve Kibernetike, me urdhër të Gjykatës, gjatë të cilit është kontrolluar një lokacion në rajonin e Prizrenit, transmeton lajmi.net.

Autoritetet bëjnë të ditur se i dyshuari, me qëllim të përfitimit të kundërligjshëm pasuror, dyshohet se kishte siguruar në mënyrë të paautorizuar të dhëna personale dhe të kartelave bankare, kryesisht të shtetasve amerikanë.

Sipas hetimeve, ai më pas i kishte vënë këto të dhëna në dispozicion për keqpërdorim duke i publikuar në platforma të caktuara online.

Me vendim të Prokurorit të Shtetit, i dyshuari është ndaluar për 48 orë, ndërsa rasti është duke u hetuar më tej.

Gjatë kontrollit, autoritetet kanë sekuestruar prova që konsiderohen të rëndësishme për procedurën hetimore. Policia dhe Prokuroria Speciale kanë bërë të ditur se veprimet e mëtejshme do të ndërmerren në koordinim me autoritetet e SHBA-së.