Një aksident i rëndë trafiku ka ndodhur mëngjesin e sotëm në rrugën magjistrale, në pjesën e njohur si “Qafa e Duhlës”, ku janë përfshirë tre kamionë dhe një automjet.

Lajmin për aksidentin e ka konfirmuar edhe zëdhënësi i Policisë së Kosovës për rajonin e Prizrenit, Shaqir Bytyqi, i cili njoftoi se nga aksidenti një person ka pësuar lëndime trupore.

“Sot, më 24 korrik 2026, rreth orës 10:00, në rrugën magjistrale, në vendin e quajtur ‘Qafa e Duhlës’, është raportuar një aksident trafiku, ku janë përfshirë tre kamionë dhe një automjet. Si pasojë e aksidentit, së paku një person ka pësuar lëndime trupore”, ka deklaruar Bytyqi.

Ai bëri të ditur se në vendin e ngjarjes kanë dalë njësitet policore, ekipet e emergjencës mjekësore dhe zjarrfikësit, të cilët po merren me menaxhimin e situatës.

“Për shkak të aksidentit dhe intervenimit të shërbimeve emergjente, qarkullimi i trafikut në këtë segment rrugor është ndërprerë në të dy drejtimet deri në një njoftim tjetër”, tha Bytyqi.

Sipas tij, njësitet kompetente policore janë duke punuar për zbardhjen e rrethanave të aksidentit dhe për rikthimin sa më të shpejtë të qarkullimit në këtë pjesë të rrugës./Lajmi.net/