Për Aeroportin e Prishtinës, viti që po lëmë pas shënon një 365 ditor të hijezuar me ngjyrë të gjelbër në motmotet e pasluftës kur flasim për sukseset, modernizimin, prurjet e reja e besimin që ka arritur të ngërthejë në vete. Një adresë e pandryshueshme për udhëtarët nga e mbarë bota që udhëtojnë në Kosovë, nga Kosova, e deri te ata që përmes Kosovës udhëtojnë në vendet e tjera dhe përdorin vendin tonë si destinacion tranziti të rrugëve ajrore.                                                                       

Dhe kur konstatojmë këtë, nuk e bëjmë pa arsye. Ajo që në realitet ka ndodhur këtë vit në Aeroportin e Prishtinës, është pasqyrë e Kosovës moderne me frymë evropiane, shkruan lajmi.net.

Aeroporti i Prishtinës me linja të reja në kryeqendrat evropiane:

Udhëtarët nga Kosova e nga cilido shtet, më nuk e kanë të nevojshme të kalojnë kufijt nacional e të përdorin Aeroportet e Rajonit për të udhëtuar direkt në shtetet ku ata planifikojnë e dëshirojnë.

Duke nisur nga 15 dhjetori, nga Aeroporti “Adem Jashari” ka fluturime të përjavshme për në kryeqendrën e Danimarkës, Copenhagen.

Nga 13 dhjetori, nga Aeroporti “Adem Jashari” ka fluturime për në zemër të Gjermanisë, për në Cologne “Bonn”, madje dy herë në javë.

Dy herë në javë, nga 12 dhjetori ka fluturime edhe për në Stockholm të Suedisë.

Nga fundi i tetorit, kosovarët mund të vizitojnë edhe bukuritë e pamatshme të Holandës, me fluturime direkte nga Prishtina për në Amsterdam, me çmime konkurruese në treg.

Nga qershori, nga Prishtinë nisën fluturimet direkte edhe për në Izmir të Turqisë.

E nga marsi i 2024 ës, nga Aeroporti i Prishtinës u zyrtarizuan edhe fluturimet direkte për në Luksemburg.

Linja të reja nga muaji i tretë i vitit që lamë pas pati edhe për Frankfurt të Gjermanisë, apo siç njihet ndryshe “New Yorku” i Evropës për shkak të ndërtesave të larta që ka.

Linja të reja të fluturimeve gjatë këtij viti pati edhe për Bullgari e Skandinavi.

Lehtësimet në udhëtime:

Ata që udhëtojnë shpesh përmes Aeroportit të Prishtinës, gjatë këtij viti kanë pasur mundësinë të shohin lehtësimin e procedurave nga momenti kur hynë brenda ambienteve të Aeroportit, deri kur ata nisen për në destinacionin e tyre.

Ekipet profesionale të mirëmbajtjes së Aeroportit gjatë këtij viti kanë qenë në nivel të hatshëm duke ofruar siguri të pistave dhe pajisjeve teknike që janë jetike për mbarëvajtjen e fluturimeve.

Nga ky vit, Aeroporti i Prishtinës ka sjellë risinë e saj, sistemin e “Self Check In”.

ANP “Adem Jashari” ka të instaluar 6 Self Check-in kioska dhe 10 Self Bag Drops për valixhe, përmes së cilave lehtësohet tej mase dhe shmangen radhët e gjata të pritjes për “Check In”.

Përveç të tjerash, në Aeroportin e Prishtinës janë hapur katër porta të reja këtë vit, që shënojnë 4 porta të reja të mundësive, të udhëtimeve.

Vit i rekordeve për Aeroportin Ndërkombëtar të Prishtinës, përmes së cilit udhëtuan mbi 2 milionë udhëtarë vetën më 8 muajt e parë 2024-ës, si asnjëherë më parë.

Pa dyshim standard i lartë i përcaktuar nga Aeroporti sivjet, e që pritet të ngritet e përmirësohet në vazhdimësi. /Lajmi.net/