Abrashi: Nënçmues përfaqësimi i punëtorëve të Trepçës prej 20 %

23:30 | 5 Tetor 2016

Nënkryetari i AAK-së dhe njohësi i fushës së ekonomisë, Gazmend Abrashi nga Aleanca për Ardhmërinë e Kosovës ka bërë një krahasim të punës së gjigantit ekonomik metalurgjik Trepça sot dhe në vitet e 90-ta.

“Trepça në vitet e 90-ta ka qenë një ndër kombinatet më të zhvilluara në Europë, dhe ka qenë prodhuesi i dytë i plumbit dhe zinkut. Trepça ka prodhuar 2 milionë tonë xehe, 665 mijë tonë janë prodhuar në Stantërg, pjesa tjetër në Kishnicë, Novobërdë dhe segmente të tjera”.

“Çka është me rëndësi është se në vitin 90, 25 mijë tonë zink dhe plumb janë prodhuar në Stantërg, kanë ekzistuar kapacitetit e elektrolizës së zinkut dhe shkritorja e plumbit”.

“Sot kemi problemin se nuk e kemi elektrolizën në funksionin ashtu si mungon edhe shkritorja e plumbit, dhe xehet shiten si të tilla”.

“Sot funksionon miniera e Stantërgut, ka pas 3200 minatorë, sot i ka 700 minatorë që një kalkulim i thjeshtë tregon që prodhimin e kemi pesë herë më të vogël se më parë”.

Abrashi që ka qenë i ftuar në Ballë për Ballë të emisionit Ora e Fundit në Klan Kosova ka treguar  se bruto prodhimi i Trepçës dikur ka qenë diku rreth 120 milionë dollarë.

Abrashi është shprehur se “Kombinati Trepça ka nevojë të ketë një trajtim të posaçëm”.

“Qeveria e ka trajtuar dhe po vazhdon ta trajtojë si barrë dhe ky ligj ka ardhur si presion i Gjykatës së Veçantë që ka thënë se nëse nuk ka zgjedhje për Trepçën, ajo do të shkojë në likuidim”.

Ai ka thënë se disa parametra në Ligjin për Trepçën nuk janë korrekte, me theks të veçantë përfaqësimi i punëtorëve.

“Është paraparë që Trepça të shndërrohet në shoqëri aksionare, nuk është lëvizje e keqe, por 80% t’i ketë Qeveria e 20 % t’i kenë punëtorët nuk më duket e drejtë”.

“Punëtorët e kanë mbajtur gjallë Trepçën, në vitin 2000 deri 2005- 2006 kanë punuar vullnetarisht, kanë luftuar që të mos fundoset”.

“Me këtë Ligj, mendoj se është momenti kur Qeveria e ka mundësinë  të ja shpërblejë punëtorëve mundin”.

“Përqindja është nënçmuese, nuk është korrekte që punëtorët të përfaqësohen me këtë % por mendoj se përfaqësimi i punëtorëve duhet të jetë shumë më i madh”.

Sipas tij, punëtorët që kanë punuar në Trepçë, duhet të kenë qasje të posaçme, dhe duhet të kenë status special, që të kenë trajtim të posaçëm.

Ai gjithashtu është shprehur se Trepçës duhet t’i caktohet titullari pasi sipas tij, deri tash nuk ka pasur pronësi mbi Trepçën.

“Nëse flasim për Ligjin pasi të përcaktohet titullari, mendoj që duhet të gjendet një partner strategjik, duhet të gjendet një kompani kredibile ndërkombëtare”.

Abrashi ka deklaruar se nëse Ligji kalon, AAK do t’i amandementojë vërejtjet.

“AAK do të ketë rolin konstruktiv se mendojmë se është aset që mund të ngrish GDP-në e Kosovës, është me rëndësi që me këtë Ligj nuk ka ide se si do të servisohen kreditorët”.

Nënkryetari i AAK-së ka insistuar se “Trepça duhet të trajtohet si një” dhe e pandarë në pjesën veriore e jugore të Mitrovicës.

“Sa më të qartë dhe më këmbëngulës të jemi në artikulim, atëhëre lëmë mundësi më të vogël të çfarëdo negocimi që është intencë e Qeverisë së Serbisë”.