Pas takimit, Abdixhiku tha se biseda është zhvilluar në frymë miqësore dhe se para zyrtarit evropian janë prezantuar orientimet kryesore të LDK-së për të ardhmen e vendit.

Sipas tij, një nga prioritetet kryesore mbetet ndërtimi i institucioneve të qëndrueshme dhe funksionale, duke filluar nga presidenca, Kuvendi dhe më pas qeveria, si bazë për stabilitetin politik të vendit.

Abdixhiku theksoi gjithashtu rëndësinë e një politike të jashtme që mbron interesat shtetërore të Kosovës dhe forcon pozitën e saj në arenën ndërkombëtare.

Një tjetër pikë e diskutuar, sipas kreut të LDK-së, ishte orientimi euroatlantik i vendit, i shoqëruar me zhvillim ekonomik, investime dhe progres për qytetarët.

Ai nënvizoi se këto parime përbëjnë boshtin e programit politik të LDK-së dhe se do të mbeten prioritet i partisë edhe pas përfundimit të procesit zgjedhor. /Lajmi.net/