Abdixhiku: Paratë e faturave të shtrenjta të rrymës t’u kthehen qytetarëve, u morën pa të drejtë

Lajme

21/05/2022 12:06

Kryetari i LDK-së, Lumir Abdixhiku ka folur për pezullimin e vendimit të ZRRE-së për shtrenjtimin e rrymës, vendim ky që u parapri nga një masë e përkohshme e vendosur nga Gjykata pas ankesës së PDK-së.

Me anë të një postimi në Facebook, Abdixhiku ka thënë se “Qeveria e paaftë e Kosovës ka detyruar” të paguajë kundërligjshëm rrymën me rritje deri në 100 për qind, shkruan lajmi.net.

Sipas Abdixhikut, tani paratë e paguara nga qytetarët në tarifat e shtrenjta duhet të kthehen sepse ato janë marrë pa të drejtë.

“Tarifat u detyruan t’i kthejnë. Tani duhet kthyer edhe paratë e plaçkitura kundërligjshëm për disa muaj rresht. Janë para tuaja; u janë marrë pa të drejtë. Dhe jo vetëm kaq. Bordi i Qeverisë e ZRRE-së, i njëjti që për muaj rresht e në mes të dimrit, ngarkoi familjet kosovare me çmime astronomike në energji – duhet të shkarkohet menjëherë. Ata s’kanë më asnjë kredibilitet”, ka shkruar Abdixhiku.

Ai madje ka thënë se LDK nga e hëna do të nis procedurat parlamentare për shkarkimin e bordit të ZRRE-së.

Postimi i plotë i Abdixhikut:

Të dashur qytetarë,

Nga sot, fatura tuaja elektrike do të llogariten pa shtrenjtim. Por, nga shkurti e deri më sot, qeveria e paaftë e Kosovës ju ka detyruar të paguani kundërligjshëm rrymën me rritje deri në 100%.

Tarifat u detyruan t’i kthejnë. Tani duhet kthyer edhe paratë e plaçkitura kundërligjshëm për disa muaj rresht. Janë para tuaja; u janë marrë pa të drejtë. Dhe jo vetëm kaq. Bordi i Qeverisë e ZRRE-së, i njëjti që për muaj rresht e në mes të dimrit, ngarkoi familjet kosovare me çmime astronomike në energji – duhet të shkarkohet menjëherë. Ata s’kanë më asnjë kredibilitet.

Nga e hëna, LDK do të nisë të gjitha procedurat e nevojshme parlamentare në këtë drejtim. Kuvendi i Kosovës ka për detyrim sanksionimin e paligjshmërisë.

Shkarkimi është i paalternativë. Siç është e paalternativë dhe përgjegjësia morale e secilit deputet, ministër e vet kryeministrit që me bindje plot mbronin këtë vendim plaçke e diskriminimi që tani më ka marrë vulën e turpit e paligjshmërisë.

Ktheni paratë; shkarkojeni Bordin; mbani përgjegjësi!. /Lajmi.net/