Kryetari i Lidhjes Demokratike të Kosovës (LDK), Lumir Abdixhiku, ka kujtuar sot 1617 personat që ende figurojnë të zhdukur që nga përfundimi i luftës në Kosovë, në mesazhin e tij për Ditën Ndërkombëtare të të Zhdukurve. Ai e ka cilësuar këtë çështje si plagën më të thellë dhe më të dhimbshme të shoqërisë kosovare.

“1617 persona vazhdojnë të mbesin të zhdukur gati një çerek shekulli pas përfundimit të luftës. Ata përfaqësojnë plagën më të thellë dhe më të dhimbshme të shoqërisë sonë – një plagë që kërkon drejtësi dhe zbardhjen e plotë të fatit të tyre,” ka deklaruar Abdixhiku, transmeton lajmi.net.

Ai ka riafirmuar përkushtimin e LDK-së ndaj zbardhjes së fatit të të zhdukurve, duke shtuar se kjo është një kauzë që nuk do të harrohet dhe për të cilën partia që ai udhëheq do të qëndrojë gjithmonë në krah të familjarëve.

“LDK qëndron krah për krah me familjarët e tyre në mbështetjen e kërkesës për të vërtetën dhe drejtësinë,” është shprehur ai, duke kërkuar që edhe bashkësia ndërkombëtare të intensifikojë presionin ndaj Serbisë për zbardhjen e këtyre rasteve.

“Bashkimi Evropian duhet të ushtrojë presion mbi shtetin serb, që ende mban të fshehur fatin e këtyre viktimave. Nuk ka asnjë dyshim se përgjegjësit e krimeve e dinë ku janë ato viktima,” ka shtuar ai.

Abdixhiku përfundoi mesazhin e tij duke theksuar se zbardhja e fatit të të zhdukurve është një prioritet i pandryshuar për LDK-në dhe një detyrim moral për të gjithë qytetarët e Republikës së Kosovës./lajmi.net/