Lajmi.net pak çaste më parë publikoi pamjet ekskluzive të një rrahjeje në rrugën “Mit’hat Frashëri” në Gjakovë.

Në rrahjen respektive është i përfshirë edhe shefi i KRU Gjakova, Hasan Krasniqi, përcjell lajmi.net.

Lidhur me rastin në fjalë, është deklaruar edhe Policia e Kosovës. Përmes raportit të para dy ditëve, është kuptuar se të mërkurën e 31 majit, është arrestuar një person, pasi ka sulmuar një tjetër.

“Rr. Mit’hat Frashëri, Gjakovë 31.05.2023 – 23:30. Është arrestuar i dyshuari mashkull kosovar pasi që ka sulmuar fizikisht viktimën mashkull kosovar. Viktima ka pranuar tretman mjekësor. Me vendim të prokurorit, i dyshuari është dërguar në mbajtje.”, thuhej në raportin e policisë.

Megjithatë, duket se ka një “hile” këtu. Kjo sepse, lajmi.net mëson që personi i dërguar në paraburgim prej 30 ditësh është Besnik Sharani, pronar i auto-larjes ku nisi përleshja.

Madje, supozohet se rasti u montua dhe se Sharani ishte vetëmbrojtur nga sulmi i Krasniqit, me këtë të fundit që në video shihet në prani të bashkëshortes dhe duke e rrahur fqinjin e tij Sharanin.

Gjithsesi, mbetet të shihet ditëve në vijim nëse do të ketë diçka më konkrete, në veçanti pas publikimit të videos.