Kryetarët e katër komunave në Veri kanë apeluar tek përfaqësuesit e BE-së që publikisht të dënojnë idenë Kryetarit të Bujanocit për bashkim të Luginës së Preshevës me Kosovën nëse Krimea i bashkohet Rusisë.

Në një komunikatë të lëshuar nga përfaqësues të këtyre komunave kanë thënë se duhet dënuar “ideja për copëtimit të Serbisë, që vije nga ‘terroristët shqiptarë’ nga jugu i Serbisë të cilët kërcënojnë me ndarje të një pjese të territorit të Serbisë”, transmeton rtklive.com.

Ata thonë se Jonuz Musliu, i cili njëherësh ishte lider politik i UÇPMB-së, ka deklaruar të martën se nëse Krimea i bashkohet Rusisë, e njëjta e drejtë i duhet dhënë edhe komunave të Preshevës dhe Bujanovcit, popullata e të cilave më 1992 përmes referendumit është përcaktuar për bashkim me Kosovën.

Kryetarët e komunave të veriut të Mitrovicës, Zveqan, Zubin Potok dhe Leposaviq, kanë kërcënuar se nëse nuk ndërpritet me deklarata të tilla për copëtimin e Serbisë, mund të vij deri tek një situatë me pasoja të paparashikueshme për tërë Ballkanin, dhe se politika e standardeve të dyfishta nga ana e ndërkombëtarëve duhet të ndalojë.