Kryeministri i Shqipërisë, Edi Rama, ka deklaruar se protestat e fundit në Tiranë, të cilat nisën në mënyrë paqësore, janë ndikuar nga forca të tjera dhe se përshkallëzimi i dhunës, sipas tij, është përgatitur prej disa muajsh.

Në një deklaratë për zhvillimet e fundit, Rama tha se Policia e Shtetit disponon të dhëna për futjen në Shqipëri të maskave dhe lëndëve eksplozive, si dhe për organizimin e grupeve që, sipas tij, kanë qenë të përfshira në protestat e dhunshme, transmeton lajmi.net.

“Përshkallëzimi është përgatitur për disa muaj”, deklaroi Rama, duke shtuar se të dhënat për futjen e këtyre materialeve në vend janë tashmë në duart e policisë.

Kreu i qeverisë bëri dallimin mes së drejtës për të protestuar dhe akteve të dhunshme, duke theksuar se e para është e garantuar, ndërsa dhuna nuk mund të justifikohet.

“Liria për të protestuar është një e drejtë e padiskutueshme e çdo qytetari në Shqipëri, dhuna është një krim i parelativizueshëm dhe i pajustifikueshëm”, u shpreh ai.

Rama kritikoi mënyrën se si, sipas tij, u pasqyruan protestat në media, duke pretenduar se publikut iu krijua një perceptim i shtrembëruar për përplasjet mes protestuesve dhe policisë.

“Shqipëria dhe shqiptarët panë me ankth se si terrori mori peng që të gjithë dhe u mbingarkuan me idenë tërësisht të rreme se studentë të pafajshëm, studentë idealistë, studentë të dalë në rrugë për të çliruar Shqipërinë u vunë nën dhunën policore”, deklaroi kryeministri.

Ai shtoi se, sipas tij, bëhej fjalë për një “përmbysje dramatike, manipuluese e një realiteti tërësisht tjetër”.

Kryeministri iu referua edhe protestave të para, të cilat u zhvilluan nën simbolikën e flamingove, duke thënë se kërkesat e protestuesve kishin baza legjitime. Megjithatë, ai pretendoi se protesta ishte ndikuar që në fillim nga forca të tjera.

“Qysh se nisi protesta paqësore masive e flamingove kam thënë se arsyet janë legjitime. Arsyet mund të jenë dhe të pafundme, por se qysh në krye të herës ajo protestë ishte e influencuar rëndë nga forca të tjera ka qenë një fakt”, tha Rama.

Sipas tij, kjo ndërhyrje është bërë më e dukshme gjatë valës së dytë të protestave, të cilën ai e cilësoi si të dhunshme.

Në deklaratën e tij, Rama përmendi edhe atë që e quajti rrjeti “Antifa”, duke e lidhur me organizimin e grupeve që, sipas tij, veprojnë në emër të komunizmit, anarkisë dhe antikapitalizmit.

“Të dhënat e organizimit të grupeve si pjesë e rrjetit Antifa, rrjetit të terrorit urban që në emër të komunizmit, anarkisë dhe antikapitalizmit ka vendosur të futet në jetën e njerëzve përmes dhunës janë në duart e Policisë së Shtetit”, deklaroi kryeministri.

Rama pretendoi gjithashtu se një pjesë e pjesëmarrësve në aktet e dhunshme janë financuar nga krimi i organizuar dhe nga burime të huaja.

“Por në duart e Policisë së Shtetit janë edhe pjesëmarrësit, apo më saktë një pjesë e pjesëmarrësve në këtë dhunë të financuar drejtpërdrejt nga krimi i organizuar dhe nga forca të huaja, nga para e ardhur nga jashtë”, u shpreh ai.

Këto akuza u paraqitën nga Rama si pretendime të mbështetura në të dhënat që, sipas tij, disponon policia.

Kryeministri foli edhe për bilancin e të lënduarve gjatë protestave, duke pretenduar se në Tiranë raporti ishte dy punonjës policie të plagosur për çdo protestues të lënduar.

“Kam ndarë me ju raportet e protestuesve të plagosur dhe policëve të lënduar në Europë dhe në Shqipëri, në vendet ku ka ndodhur diçka e ngjashme dhe në Tiranë, ku fatkeqësisht ka pasur dy punonjës policie të plagosur për një protestues të lënduar”, deklaroi Rama.

Në fund, ai kritikoi Partinë Demokratike, duke e akuzuar për përfshirje në përshkallëzimin e situatës dhe duke iu referuar protestës pranë Ministrisë së Arsimit.

“Glasa mbi tortë është PD, e cila dje mori dhe autorësinë e dhunës te Ministria e Arsimit, e fillimit të dhunës”, tha Rama.

Deri në këtë fazë, akuzat për organizimin dhe financimin e protestave të dhunshme, si dhe për përfshirjen e rrjetit “Antifa” dhe burimeve të huaja, mbeten pretendime të kryeministrit të Shqipërisë, të cilat në deklaratën e publikuar nuk shoqërohen me prova konkrete të bëra publike./lajmi.net/