Ish-presidenti i Barcelonës, Joan Gaspart, ka kritikuar Lionel Messin për vonesën e ceremonisë së lamtumirës me tifozët e klubit katalunas, duke paralajmëruar se do ta bojkotonte homazhin nëse argjentinasi vendos ta vizitojë “Camp Nou” vetëm pasi Joan Laporta të mos jetë më president i klubit.

Messi u largua nga Barcelona në vitin 2021, duke iu bashkuar Paris Saint-Germainit, por që atëherë nuk ka zhvilluar një ceremoni zyrtare lamtumire me tifozët në stadiumin ku kaloi pjesën më të madhe të karrierës së tij.

Marrëdhëniet e tensionuara me presidentin aktual të Barcelonës, Joan Laporta, janë përmendur si një nga arsyet e mundshme të vonesës së kësaj ceremonie.

Duke folur në podkastin “Solo para Cales”, Gaspart, i cili ishte president i Barcelonës kur Messi nënshkroi me klubin në moshën 13-vjeçare, theksoi se argjentinasi duhet ta respektojë klubin dhe tifozët, pavarësisht se kush e drejton atë.

“Leo është një futbollist i shkëlqyer, më i miri në botë. Ai nuk duhet të harrojë: Barcelona është më e madhe se ai. Ai duhet të jetë i kujdesshëm”, deklaroi Gaspart.

Ai shtoi se fjalët e tij burojnë nga respekti për futbollistin që e kishte afruar te Barcelona në moshë të re, duke insistuar se klubi është më i madh se çdo individ.

Gaspart paralajmëroi se do ta konsideronte problematike nëse Messi do të vendoste pengesa për t’u kthyer në Barcelonë dhe për t’u përshëndetur me tifozët.

“Kushdo që është president, ai duhet të vijë dhe t’i thotë lamtumirë Barçës. Nëse Leo Messi vjen vetëm për të thënë lamtumirë ditën që Laporta nuk është më aty dhe refuzon të vijë sepse Laporta është president, unë nuk do ta nderoja. Kush mendon ai se është?”, u shpreh ish-presidenti i Barcelonës.

“Nëse Laporta do të mungonte për shkak të kësaj gjendjeje, unë do ta bojkotoja homazhin”, shtoi ai.

Ndërkohë, Messi vazhdon karrierën te Inter Miami, në Shtetet e Bashkuara të Amerikës, ku kontrata e tij është e vlefshme deri në fund të vitit 2028.

Pavarësisht largimit në vitin 2021, lidhja e tij me Barcelonën dhe tifozët e klubit mbetet një temë e diskutuar, ndërsa një ceremoni zyrtare lamtumire në “Camp Nou” ende nuk është realizuar.