Ish-gjyqtari i Gjykatës Kushtetuese, Kadri Kryeziu, ka thënë se presidenti i ri mund të zgjidhet më së largu deri më 6 tetor. Ai ka shtuar se nëse respektohet aktgjykimi i Gjykatës Kushtetuese, Kuvendi do të shpërndahej dhe më pas do të shpalleshin zgjedhjet e jashtëzakonshme.

“Ka afat deri më 6 tetor. Nëse respektohet aktgjykimi i Gjykatës Kushtetuese, shpërndahet Parlamenti me një dekret të ushtrueses së detyrës së presidentes dhe pastaj, me një dekret të veçantë, bëhet shpallja e zgjedhjeve të jashtëzakonshme, të cilat duhet të mbahen brenda 45 ditësh”, tha Kryeziu për Front Online.

Më 29 shtator, Gjykata Kushtetuese publikoi aktgjykimin e plotë, në të cilin konstatoi se Kuvendi është konstituuar, ndërsa zgjedhjen e Qeverisë “Kurti 4” e vlerësoi në përputhje me Kushtetutën.

Në të njëjtin aktgjykim, Gjykata përcaktoi edhe afatin deri më 6 tetor për zgjedhjen e presidentit të Kosovës.

Sipas aktgjykimit, Kryesia e Kuvendit, në rrethana të caktuara, mund të funksionojë edhe pa një nënkryetar, nëse ka kuorum, ndonëse Gjykata ka bërë thirrje që të votohet sa më parë nënkryetari nga PDK-ja.

Gjykata ka konstatuar se vendi shkon në zgjedhje brenda 45 ditësh nëse presidenti nuk zgjidhet deri më 6 tetor.