Policia e Kosovës ka njoftuar se ka arrestuar tre persona të dyshuar për përfshirje në disa raste të vjedhjeve të rënda në rajonin e Gjilanit dhe në rajone të tjera të Kosovës.

Sipas njoftimit të Policisë, hetuesit e Sektorit Rajonal të Hetimeve në Gjilan, në koordinim me Prokurorinë Themelore në Gjilan, kanë zhvilluar një hetim të gjatë dhe intensiv, i cili ka rezultuar me arrestimin e tre personave të dyshuar.

Dy prej të arrestuarve janë shtetas të Kosovës, ndërsa njëri është shtetas i Shqipërisë.

“Të njëjtit dyshohet se në bashkëveprim dhe si pjesë e një grupi, me qëllim të përfitimit të kundërligjshëm pasuror për një periudhë të gjatë kohore, kanë kryer disa vepra penale të vjedhjes së rëndë në rajonin e Gjilanit dhe gjithashtu dyshohet edhe në rajone të tjera të Republikës së Kosovës”, thuhet në njoftimin e Policisë.

Policia ka bërë të ditur se një person tjetër, i njohur për autoritetet dhe i dyshuar për përfshirje në aktivitetin e grupit, është identifikuar dhe është vënë në kërkim policor.

Në kuadër të hetimeve janë realizuar bastisje në disa lokacione në Gjilan, Prishtinë dhe Fushë-Kosovë.

Gjatë bastisjeve dhe veprimeve hetimore janë sekuestruar pajisje dhe prova të ndryshme që dyshohet se lidhen me veprimtarinë kriminale të grupit.

“Ndërsa gjatë hetimeve janë sekuestruar prova dhe pajisje të ndryshme që dyshohet se lidhen me veprimtarinë kriminale të personave të dyshuar. Në mesin e sendeve të sekuestruara pajisje të ndryshme që dyshohet se janë përdorur për komunikim, maskim dhe mjete për hapje me forcë të dyerve, kasafortave dhe objekteve të tjera, me qëllim të kryerjes së vjedhjeve”, thuhet në njoftim.

Të dyshuarit janë arrestuar dhe ndaj tyre, në koordinim me Prokurorinë Themelore në Gjilan, janë ndërmarrë procedurat e mëtejshme ligjore.

Ndërkohë, hetimet po vazhdojnë për dokumentimin e plotë të rasteve, identifikimin e veprave të tjera të mundshme dhe sigurimin e provave që lidhen me aktivitetin e dyshuar kriminal të grupit. /Lajmi.net/