Analisti politik, Agon Maliqi, ka reaguar lidhur me dokumentet që pretendohet se janë gjetur në telefonin e të dyshuarit për spiunazh, Fatmir Sheholli, e që po paraqiten si dokumente autentike të institucioneve të inteligjencës serbe.

Maliqi ka kërkuar kujdes të shtuar nga mediat dhe komentuesit gjatë trajtimit të këtyre materialeve, duke ngritur dyshime për autenticitetin e tyre.

“Vërtetësia e përmbajtjes së dokumenteve të gjetura në telefonin e një agjenti periferik si Sheholli, e që po prezantohen shpesh pa hezitim si dokumente autentike të institucioneve të Serbisë, duhet trajtuar me skepticizëm ekstrem nga mediat dhe komentuesit”, ka shkruar Maliqi.

Sipas tij, publikimi i dokumenteve mund të jetë me interes publik, por interpretimi i tyre duhet të bëhet me shumë kujdes.

“Mediat kanë të drejtë (madje edhe detyrë) që t’i publikojnë ato dokumente sepse janë me interes pubik, por edhe duhet të tregojnë shumë kujdes se si i interpretojnë”, ka thënë ai.

Maliqi ka vlerësuar se Prokuroria mund t’i përdorë këto dokumente në aktakuzë nëse posedon prova se Sheholli i ka marrë nga zyrtarë serbë dhe më pas i ka shpërndarë.

“Prokuroria ka bazë që t’i përdorë ato dokumente në aktakuzë nëse kanë fakte se Sheholli i ka marrë ato nga zyrtarë serbë dhe i ka shpërndarë tutje”, është shprehur ai.

Ai ka ngritur dilema edhe rreth pretendimeve se Sheholli kishte qasje në dokumente të nivelit strategjik.

“Logjikisht nuk ka arsye të besohet se një agjenti ordiner si Sheholli do t’i jepej qasje në dokumente të nivelit strategjik”, ka shkruar Maliqi.

Duke iu referuar përmbajtjes së dokumenteve, ai ka thënë se disa prej tyre mund të jenë pjesë e një operacioni dezinformues.

“Duke e parë nivelin amator të shkrimeve dhe kontradiktat logjike brenda teksteve, gjasat më të mëdha janë se këto lloj dokumentesh janë thjesht sajesa që prodhohen si pjesë e asaj që në gjuhën e KGB-së njihen si ‘masa aktive’”, ka deklaruar Maliqi.

Sipas tij, qëllimi i një skenari të tillë do të ishte ndikimi në opinionin publik dhe thellimi i përçarjeve.

“E që si zakonisht e kanë për synim që të shpërlahen në opinion publik si dokumente të vërteta, për ta shkaktuar pikërisht këtë që është duke ndodhur – përçarjen dhe polarizimin në Kosovë”, ka përfunduar ai. /Lajmi.net/