Një person është plagosur me armë zjarri në rrugën regjionale Sarosh–Rahovec, në orët e para të mëngjesit të 22 gushtit.

Sipas Policisë së Kosovës, viktima ishte duke udhëtuar me veturë kur një automjet i kishte bërë shenjë me drita. Pasi ishte ndalur, një person dyshohet se kishte shtënë me armë zjarri në drejtim të tij, duke e plagosur në pjesën e pasme të kokës, shkruan lajmi.net.

“Pasi viktima ishte ndalur, një person kishte shtënë me armë zjarri në drejtim të tij, duke e plagosur në pjesën pasme të kokës”, thuhet në raportin e Policisë.

Pas të shtënave, i dyshuari dyshohet se ishte afruar te viktima dhe e kishte goditur disa herë me kondak të armës së shkurtër.

Gjatë përleshjes, viktima kishte arritur t’ia marrë armën të dyshuarit dhe më pas ishte larguar nga vendi i ngjarjes për të kërkuar ndihmë mjekësore.

Njësitë policore kanë dalë në vendin e ngjarjes, ku kanë sekuestruar një pistoletë pa municion.

Viktima është dërguar për tretman mjekësor, ndërsa për rastin është njoftuar prokurori. Policia ka bërë të ditur se rasti është duke u hetuar nga njësitet kompetente.

Rasti është iniciuar për “Lëndim të rëndë trupor & armëmbajtje pa leje”. /Lajmi.net/