Prokuroria Themelore në Mitrovicë, përkatësisht Departamenti i Krimeve të Rënda, ka ngritur aktakuzë në Gjykatën Themelore në Mitrovicë ndaj të pandehurit me inicialet A.S., për veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”.

Sipas aktakuzës, ngjarja ka ndodhur më 27 maj 2026, në rrugën “Adem Voca” në Mitrovicë, në banesën e viktimës E.I, shkruan lajmi.net.

Prokuroria pretendon se i pandehuri A.S. e ka privuar nga jeta viktimën në mënyrë tinëzake dhe mizore.

Sipas aktakuzës, i pandehuri kishte shkuar në banesën e viktimës, ku në atë moment ndodheshin edhe i dëmtuari S.I., dëshmitari I.M. dhe vajza e tij e mitur, gjashtëvjeçare.

Në momentin kur viktima i ka hapur derën, sipas Prokurorisë, i pandehuri i ka folur, e ka përqafuar dhe i ka uruar festën e Kurban Bajramit, për të hyrë më pas në kuzhinë.

“Papritmas nxjerr armën e ftohtë – thikën dhe e prenë viktimën në regjionin e përparmë të qafës – duke i shkaktuar plagë vdekjeprurëse viktimës ende pa arritur të dërgohet në spital”, thuhet në aktakuzën e Prokurorisë.

Pas këtij veprimi, sipas aktakuzës, i pandehuri i është drejtuar edhe të dëmtuarit S.I., duke tentuar ta godasë në fyt me thikë.

I dëmtuari ka arritur ta shmangë goditjen, ndërsa, sipas Prokurorisë, i pandehuri e ka goditur në fytyrë, përkatësisht në hundë dhe buzë, duke i shkaktuar lëndime të lehta trupore me pasoja të përkohshme për shëndetin.

Prokuroria Themelore në Mitrovicë, me rastin e ngritjes së aktakuzës, ka kërkuar nga gjykata që i pandehuri të shpallet fajtor për veprat penale që i vihen në barrë dhe t’i shqiptohet dënim meritor sipas ligjit. /Lajmi.net/