Kryetari i Aleancës, Ardian Gjini, ka përshëndetur qëndrimin e sotëm të Lidhjes Demokratike të Kosovës për të mos marrë pjesë në qeverisje me Albin Kurtin dhe Vetëvendosjen.

Gjini ka thënë se Aleanca prej kohësh ka paralajmëruar, siç e quan ai, “lojën e pandershme” të Kurtit dhe partisë së tij.

“Prandaj, qëndrimi i sotëm i Lidhjes Demokratike të Kosovës për të mos marrë pjesë në qeverisje me Kurtin është i drejtë dhe parimor dhe si të tillë e përshëndes”, ka shkruar Gjini.

Sipas tij, Kurti synon të ketë kontroll të plotë mbi institucionet dhe shtetin, të cilin, siç shprehet Gjini, “po e degradon çdo ditë”.

Kryetari i Aleancës ka përsëritur edhe gjashtë kushtet e subjektit të tij për çdo qeveri të ardhshme, duke theksuar se Kosova nuk guxon të kontrollohet nga një njeri.

Aleanca kërkon që qeveria e ardhshme të pranojë këto pika:

1. 1. Pranimin e gazit amerikan;
   2. Ndërtimin e kapaciteteve energjetike;
   3. Përfundimin e infrastrukturës kryesore;
   4. Ngritjen e pragut të TVSH-së për bizneset e vogla;
   5. Lirimin e bujqve nga tatimi në pronë;
   6. Investime në kryeqytet.