Njohësi i çështjeve politike, Shenoll Muharremi, ka reaguar ashpër lidhur me zhvillimet e fundit politike në vend, duke pretenduar se kryeministri dhe ministrat që kanë dhënë betimin si deputetë nuk duhet të vazhdojnë të ushtrojnë funksionet e tyre në Qeveri.

Muharremi, përmes një postimi në rrjetet sociale, është thirrur edhe në vendimin e Gjykatës Supreme, duke argumentuar se një person nuk mund të mbajë njëkohësisht mandatin e deputetit të betuar dhe postin e kryeministrit apo ministrit.

“Populli ka të drejtë të aktivizohet dhe t’i nxjerrë jashtë zyrës kryeministrin dhe ministrat që po qëndrojnë ilegalisht në zyrat e qeverisë, pasi që kanë dhënë betimin si deputetë. Sidomos pas vendimit të Gjykatës Supreme për këtë rast”, ka shkruar Muharremi.

Ai ka kërkuar që institucionet të kthehen te, siç e quan ai, “rendi dhe ligji”, duke bërë thirrje për konstituimin e Kuvendit dhe formimin e institucioneve të reja.

“Ndaleni këtë çmenduri dhe kthehuni tek rendi dhe ligji, largohuni nga anarkia, uzurpimi i institucioneve, shkeljet kushtetuese dhe respektojini ligjet, rregulloret dhe vendimet e gjykatave”, ka deklaruar ai.

Muharremi ka thënë se qytetarët kanë të drejtë të kërkojnë zbatimin e ligjit, ndërsa ka përdorur gjuhë të ashpër ndaj atyre që, sipas tij, nuk respektojnë vendimet gjyqësore.

“Qytetarët dhe të gjithë kanë të drejtë absolute me kërku zbatimin e ligjit… por edhe në situata ekstreme kur nuk kuptoni, kanë të drejtë me ju nxjerrë jashtë zyrës së qeverisë”, ka shkruar ai.

Në fund, Muharremi ka bërë thirrje për konstituimin e Kuvendit dhe formimin e Qeverisë së re.

“Konstituojeni Kuvendin dhe mundeni lirshëm me formu qeverinë e juaj, votat i keni, dhe me vazhdu punën, këtë jua ka dhënë populli në zgjedhjet e 7 qershorit”, ka shkruar ai. /Lajmi.net/