Inspektorati i Mbikëqyrjes së Tregut ka zhvilluar kontrolle në disa rajone të Kosovës, me fokus të veçantë te produktet e qumështit dhe mbrojtja e konsumatorëve.

Gjatë aksionit, 8 ekipe të inspektorëve kanë kryer kontrolle në markete të mëdha në Mitrovicë, Prizren, Pejë, Prishtinë, Lipjan dhe Shtime, raporton lajmi.net

Sipas IQMT-së, janë evidentuar shtatë produkte me mospërputhje, bazuar në raportet zyrtare të Agjencisë së Ushqimit dhe Veterinarisë (AUV).

Postimi i plotë:

IQMT tërheq nga tregu 5,278 njësi të produkteve të qumështit të evidentuara me mospërputhje

Inspektorati i Mbikëqyrjes së Tregut (IQMT) ka vazhduar edhe sot aksionin e inspektimeve në treg, me fokus të veçantë te produktet e qumështit dhe zbatimin e masave për mbrojtjen e konsumatorëve.

Përmes 8 ekipeve të inspektorëve, IQMT ka realizuar kontrolle në marketet e mëdha në regjionet e Mitrovicës, Prizrenit, Pejës, Prishtinës, Lipjanit dhe Shtimes.

Gjatë kontrolleve janë evidentuar 7 produkte me mospërputhje, të përcaktuara në raportet zyrtare të Agjencisë së Ushqimit dhe Veterinarisë (AUV), të cilat janë gjetur në raftet e operatorëve ekonomikë të inspektuar:

Holla Barista 3.8%, 1 litër;

Crem për pite Bylmeti;

Holla Cooking Crem, 1 litër;

Qumësht My Cow 3.2%, 1 litër;

Mazë tradicionale Drena;

Mazë tradicionale Milket;

Krem për pite Bianco, 700 g.

Duke u bazuar në raportet zyrtare të AUV-së, nr. 4942, datë 27.07.2026, dhe nr. 5203, datë 10.08.2026, nga tregu gjatë ditës së sotme janë tërhequr 5,278 njësi të produkteve të lartcekura.

Gjithashtu, janë urdhëruar qendrat e operatorëve ekonomikë që kanë rrjete marketesh në të gjithë territorin e Republikës së Kosovës që të largojnë nga shitja produktet e evidentuara në raportet e AUV-së./Lajmi.net/