Personi që u plagos sot me armë zjarri në Gjakovë është duke marrë trajtim në Spitalin e Përgjithshëm “Isa Grezda”, ndërsa gjendja e tij shëndetësore aktualisht është stabile.

Spitali ka njoftuar se pacienti është pranuar rreth orës 16:25 në Shërbimin Emergjent, ku menjëherë i janë kryer ekzaminimet dhe shërbimet e nevojshme mjekësore.

“Menjëherë pas pranimit, pacientit i janë kryer të gjitha ekzaminimet dhe shërbimet e nevojshme mjekësore dhe i është ofruar trajtimi përkatës”, thuhet në njoftimin e spitalit.

Sipas njoftimit, pacienti është shtrirë në spital dhe do të vazhdojë trajtimin e mëtejmë.

Ndërkohë, rastin e ka konfirmuar edhe Policia e Kosovës për lajmi.net.

Zëdhënësja e Policisë për rajonin e Gjakovës, Vlera Krasniqi, ka bërë të ditur se viktima ka pranuar tretman mjekësor, ndërsa personi i dyshuar është arrestuar.

“Bazuar në informacionet fillestare, viktima ka pranuar tretman mjekësor, ndërsa i dyshuari është arrestuar. Të dy personat, viktima dhe i dyshuari, janë meshkuj, shtetas të Republikës së Kosovës dhe të moshës madhore”, ka deklaruar Krasniqi.

Njësitë relevante policore janë në vendngjarje dhe po vazhdojnë veprimet hetimore për sqarimin e plotë të rrethanave të rastit. /Lajmi.net/