Sulmuesi i Barcelonës, Ferran Torres ka dhënë dritën jeshile për transferimin e tij te Paris Saint-Germain, ndërsa tani priten negociatat mes dy klubeve për tarifën e transferimit.

Paris Saint-Germain ka arritur një marrëveshje me Ferran Torres për kushtet personale të kontratës, duke bërë një hap të rëndësishëm drejt transferimit të sulmuesit spanjoll nga Barcelona.

Sipas gazetarit të njohur të transferimeve, Fabrizio Romano, Torres ka informuar drejtuesit e Barcelonës për dëshirën e tij për t’iu bashkuar projektit të PSG-së.

Raportimet e mëparshme nga mediumet Marca dhe Jijantes kishin bërë të ditur gjithashtu interesimin e klubit francez dhe vullnetin e lojtarit për të ndryshuar ambient.

Tashmë, fokusi zhvendoset te klubet. PSG dhe Barcelona pritet të nisin negociatat për tarifën e transferimit, pasi marrëveshja mes parisienëve dhe Torresit nuk nënkupton ende një marrëveshje përfundimtare mes dy klubeve.

Barcelona, nga ana tjetër, nuk po e detyron Torresin të qëndrojë në “Camp Nou” dhe është e gatshme të dëgjojë ofertat për sulmuesin spanjoll.

Nëse palët arrijnë një marrëveshje për shumën e transferimit, Torres mund të bëhet një nga afrimet e radhës të PSG-së, duke nisur një kapitull të ri në karrierën e tij.