Një person është arrestuar në Prishtinë, pasi dyshohet se ka penguar zyrtarët gjatë kryerjes së detyrës zyrtare, ndërsa gjatë arrestimit një zyrtar policor ka pësuar lëndime trupore.

Sipas raportit 24-orësh të Policisë së Kosovës, rasti ka ndodhur më 5 gusht 2026, rreth orës 08:50, në rrugën “Luan Haradinaj” në Prishtinë.

“Është arrestuar i dyshuari kosovar për shkak se i kishte penguar zyrtarët në një institucion gjatë kryerjes së detyrës zyrtare. Gjatë arrestimit një zyrtar policor ka pësuar lëndime trupore për çka ka pranuar trajtim mjekësor”, thuhet në raportin e Policisë.

Policia bëri të ditur se pas përfundimit të procedurave fillestare dhe inicimit të rastit, prokurori kompetent ka vendosur që i dyshuari të lirohet në procedurë të rregullt.

“Me vendim të prokurorit pas inicimit të rastit i dyshuari është liruar në procedurë të rregullt”, thuhet në njoftim. /Lajmi.net/