Një person është arrestuar në Fushë Kosovë nën dyshimin për veprën penale “Vrasje në tentativë”, pas një sulmi me thikë ndaj një qytetari.

Sipas raportit 24-orësh të Policisë së Kosovës, rasti ka ndodhur më 31 korrik 2026, rreth orës 23:00, në rrugën “Nëna Terezë” në Fushë Kosovë.

“Viktima mashkull kosovar, ka njoftuar se është sulmuar me thikë nga një person i panjohur. Pas hetimeve lidhur me rastin është identifikuar dhe arrestuar i dyshuari mashkull kosovar”, thuhet në raportin e Policisë.

Policia bën të ditur se i lënduari është dërguar për trajtim mjekësor dhe, sipas mjekëve, ndodhet jashtë rrezikut për jetë.

“Viktima është dërguar për trajtim mjekësor dhe sipas mjekëve është jashtë rrezikut për jetë, ndërsa i dyshuari pas inicimit të rastit në konsultim me prokurorin është dërguar në mbajtje”, thuhet tutje në raportin 24-orësh të Policisë së Kosovës. /Lajmi.net/