Mijëra persona janë evakuuar në ishullin grek të Kretës, pasi zjarret e pyjeve, të nxitura nga erërat e forta, kanë kërcënuar zonat turistike dhe fshatrat.

Rreth 8,000 persona janë evakuuar gjatë natës në Rethymno, ku shpejtësia e erërave ka arritur deri në 125 kilometra në orë, shkruan BBC.

Evakuimet u kryen pasi të mërkurën dy zjarrfikës humbën jetën në ishull, pasi mbetën të bllokuar pranë Krya Vrysit. Një zjarrfikës i tretë humbi jetën pranë qytetit port Gytheio, në Peloponez.

Greqia është një nga shumë vendet evropiane që po përballen me zjarre shkatërruese dhe thatësira, ndërsa kontinenti po përjeton temperatura jashtëzakonisht të larta.

Meteorologët paralajmërojnë se kushtet e favorshme për përhapjen e zjarreve do të shtrihen drejt pjesës qendrore të Evropës gjatë kësaj jave, ndërsa Greqia dhe Turqia pritet të jenë ndër vendet më të prekura.