Në fshatin Kalludër të Zubin Potoku po vazhdojnë edhe sot gërmimet nën dyshimin për varrezë masive nga lufta e fundit në Kosovë.

Gërmimet aty nisën që dje nën masa të shtuara të Policisë së Kosovës.

Ky gërmim nisi pasi Policia e Kosovës ka arrestuar dy serbë të dyshuar për rastin e njohur si “Grupi i intelektualëve të Mitrovicës”.

Në këtë varrezë dyshohet për gjetjen e eshtrave të 23 shqiptarëve të zhdukur nga ky grup të njohur si intelektualët e Mitrovicës raporton lajmi.net.

Pasi dje në këtë vend të ngjarjes qëndruan ministra të shumtë në detyrë, sot aty shkoi edhe kryetari i Skenderajt Sami Lushtaku si dhe pak më parë ka arritur edhe ministrja në detyrë e Punëve të Jashtme dhe Diasporës, Donika Gërvalla.

Lushtaku falënderoi Policinë e Kosovës për veprimet e marra në këtë rast./Lajmi.net/