Aston Villa nuk ka dëshirë ta shesë Emiliano Martinezin, ndaj Juventusi ka rifilluar bisedimet për Zion Suzukin dhe Guglielmo Vicarion, sipas raportimeve nga Italia.

“Zonja e Vjetër” vazhdon kërkimet për një portier të ri, por objektivi kryesor, Emiliano Martinez, nuk pritet të largohet nga Aston Villa gjatë kësaj vere.

Sipas “Sky Sport Italia”, Juventusi nuk është i gatshëm të ofrojë më shumë se 6-7 milionë euro për portierin argjentinas, i cili thuhet se ka arritur tashmë një marrëveshje në parim me klubin bardhezi.

Drejtori i operacioneve të futbollit tek Aston Villa, Damian Vidagany, deklaroi javën e kaluar se klubi nuk ka ndërmend ta lejojë largimin e Martinezit.

Si “Sky Sport Italia” ashtu edhe “”Tuttosport raportojnë se bisedimet mes Juventusit dhe Parmës për Zion Suzukin rifilluan të enjten gjatë një takimi të Lega Serie A në Milano.

Në bisedimet joformale morën pjesë drejtori i Juventusit, Giovanni Carnevali, dhe Federico Cherubini i Parmës, ish-drejtor sportiv i bardhezinjve.

Ndërkohë, Juventusi mbetet i interesuar edhe për portierin e Tottenhamit, Guglielmo Vicario.

Sipas “Sky Sport Italia”, kontaktet mes klubit torinez dhe agjentit të portierit italian janë ende në vazhdim.

Vicario u la jashtë turneut parasezonal të Tottenhamit në Zelandën e Re dhe Australi për shkak të një dëmtimi të lehtë, por raportimet sugjerojnë se ai nuk bën pjesë në planet e trajnerit Roberto De Zerbi për sezonin e ri.