Deputetja e zgjedhur e Lidhjes Demokratike të Kosovës (LDK), Hykmete Bajrami, ka kërkuar mbylljen e deponisë së Sferkës, duke reaguar pas angazhimit të njësive të specializuara të Forcës së Sigurisë së Kosovës (FSK) për shuarjen e zjarrit që prej ditësh ka përfshirë këtë lokacion.

Përmes një postimi në rrjetet sociale, Bajrami e mirëpriti vendimin e FSK-së dhe urdhrin e komandantit të saj, gjenerallejtënant Bashkim Jashari, për ndërhyrje në deponi, por vlerësoi se reagimi ka ardhur me shumë vonesë.

“E mirëpres vendimin e Forcës së Sigurisë së Kosovës dhe urdhrin e Komandantit të FSK-së, Gjenerallejtënant Bashkim Jashari, për angazhimin e njësive të specializuara në deponinë e Sferkës. Fatkeqësisht, ky angazhim vjen pas afro dhjetë ditësh djegie të pandërprerë”, ka shkruar Bajrami.

Ajo ka kërkuar që të hetohen të gjitha përgjegjësitë për, siç tha, vonesën në reagimin institucional dhe pasojat që zjarri ka shkaktuar për qytetarët, mjedisin dhe pronën.

“Përgjegjësia për këtë vonesë, për mosveprimin institucional dhe për dëmin e shkaktuar ndaj shëndetit të qytetarëve, mjedisit dhe pronës duhet të hetohet deri në fund”, u shpreh ajo.

Bajrami ngriti edhe pyetje lidhur me reagimin e vonuar të institucioneve, duke theksuar se banorët e zonës janë ekspozuar për ditë të tëra ndaj tymit toksik.

“Pse u prit kaq gjatë që të angazhoheshin kapacitetet shtetërore? Pse qytetarët u ekspozuan për ditë të tëra ndaj tymit toksik dhe pse u desh të helmoheshin banorë e protestues që institucionet të reagonin?”, ka pyetur ajo.

Deputetja e zgjedhur bëri të ditur se mbështet kallëzimin penal që ka dorëzuar më herët për këtë rast dhe u bëri thirrje organeve të drejtësisë të zhvillojnë hetime të plota ndaj të gjithë përgjegjësve.

“I qëndroj prapa kallëzimit penal që kam ushtruar dhe kërkoj nga institucionet e drejtësisë që të zhvillojnë hetime të plota ndaj të gjithë përgjegjësve, të përcaktojnë përgjegjësinë dhe ata që kanë dështuar të veprojnë t’i nxjerrin para drejtësisë”, ka deklaruar Bajrami.

Në përfundim, ajo përsëriti kërkesën që deponia e Sferkës të mbyllet, duke e cilësuar këtë si zgjidhjen e vetme për të shmangur përsëritjen e situatave të ngjashme.