“Lidhja me Popullin” ka njoftuar se është anuluar tubimi që ishte paralajmëruar të mbahej pasditen e së dielës para selisë së Lidhjes Demokratike të Kosovës (LDK), në mbështetje të kryetarit të partisë, Lumir Abdixhiku.

Sipas njoftimit, vendimi për anulimin e protestës është marrë me kërkesë të autoriteteve të LDK-së.

“Ju njoftojmë se, me kërkesë të autoriteteve të LDK-së dhe në funksion të mbarëvajtjes së rregullt të procesit, kemi marrë vendim për anulimin e tubimit të paraparë për sot, në ora 17:00, para zyrave të LDK-së”, thuhet në njoftim.

Organizatorët kanë bërë thirrje që procesi i shqyrtimit të nismës për shkarkimin e Abdixhikut të zhvillohet në mënyrë demokratike dhe transparente.

“Njëkohësisht, bëjmë thirrje që i gjithë procesi të zhvillohet në mënyrë demokratike, transparente dhe duke respektuar vullnetin e elektoratit të LDK-së për një LDK unike, të bashkuar dhe të fortë”, thuhet më tej në reagim.

“Lidhja me Popullin” ka falënderuar qytetarët për mirëkuptimin dhe përgjegjësinë e treguar.

“Faleminderit për mirëkuptimin dhe për përgjegjësinë e treguar”, thotë njoftimi.