Vinicius Junior dhe Real Madridi po vazhdojnë bisedimet për rinovimin e kontratës, por palët ende nuk kanë arritur një marrëveshje për shkak të kërkesave financiare të sulmuesit brazilian.

Sipas raportimeve të mediave spanjolle, 25-vjeçari kërkon një pagë neto prej rreth 20 milionë eurosh në sezon, një shifër që do ta vendoste në krye të listës së futbollistëve më të paguar te gjiganti madrilen.

Drejtuesit e Real Madridit janë të kujdesshëm për të mos prishur strukturën e pagave në skuadër, duke marrë parasysh edhe statusin e yjeve si Kylian Mbappe dhe Jude Bellingham. Klubi synon të shmangë krijimin e dallimeve të mëdha financiare që mund të ndikojnë në harmoninë e dhomave të zhveshjes, ndaj deri më tani nuk ka pranuar kërkesat e plota të brazilianit.

Megjithatë, optimizmi mbetet i pranishëm që marrëveshja të arrihet në javët e ardhshme, pasi si Vinicius ashtu edhe Real Madridi dëshirojnë të vazhdojnë bashkëpunimin afatgjatë. Klubi nuk e konsideron largimin e sulmuesit, ndërsa bisedimet pritet të intensifikohen pas përfundimit të angazhimeve në Kupën e Botës 2026.