Dogana e Kosovës ka bërë të ditur se ka tejkaluar shifrën e 1 miliard eurove të hyra të inkasuara, duke regjistruar një rekord të ri në të hyrat buxhetore.

Sipas njoftimit, deri më sot janë inkasuar 1 miliard e 7 milionë euro, që paraqet një rritje prej 5.5 për qind krahasuar me të njëjtën periudhë të vitit të kaluar, kur të hyrat kishin arritur në 955 milionë euro, transmeton lajmi.net.

Dogana vlerëson se ky rezultat është arritur falë performancës së qëndrueshme ekonomike, bashkëpunimit me sektorin privat, respektimit të obligimeve ligjore nga bizneset, si dhe rritjes së efikasitetit në luftimin e ekonomisë joformale dhe lehtësimit të procedurave tregtare.

Një nga zhvillimet kryesore të këtij viti, sipas Doganës, është zbatimi i sistemit të deklarimit para arritjes së mallrave, i mundësuar pas shtetëzimit të plotë të terminaleve doganore dhe heqjes së pagesave për shfrytëzimin e tyre.

Ky ndryshim, i cili për vite me radhë ishte evidentuar si sfidë në Raportin e Progresit, sipas Doganës tashmë ka dhënë rezultate pozitive dhe është mirëpritur nga komuniteti i biznesit.

Dogana e Kosovës ka theksuar se do të vazhdojë investimet dhe përpjekjet për rritjen e mëtejshme të kapaciteteve operative dhe përmirësimin e shërbimeve ndaj bizneseve dhe qytetarëve.