Dy persona kanë mbetur të lënduar si pasojë e një sulmi me thikë që ka ndodhur mëngjesin e së premtes në Ferizaj.

Ngjarja është regjistruar rreth orës 07:50 në rrugën “Dëshmorët e Kombit”, pranë Postës Qendrore, ku, sipas policisë, dyshohet se dy persona janë sulmuar me mjet të mprehtë.

Pas dhënies së ndihmës së parë në vendin e ngjarjes nga ekipet mjekësore, të lënduarit janë transportuar në Emergjencën e Ferizajt për trajtim të mëtejshëm.

Zëdhënësi i Policisë për rajonin e Ferizajt, Kanun Veseli, për lajmi.net ka bërë të ditur se i dyshuari është larguar menjëherë pas incidentit dhe policia është në kërkim të tij.

“I dyshuari është larguar nga vendi i ngjarjes në drejtim të panjohur. Njësitë policore kanë dalë në vendin e ngjarjes dhe janë duke ndërmarrë veprime intensive hetimore për identifikimin dhe arrestimin e të dyshuarit, si dhe për sqarimin e plotë të rrethanave të rastit”, tha Kanun Veseli për lajmi.net.

Policia ka nisur hetimet për zbardhjen e plotë të rastit, ndërsa motivet e sulmit mbeten ende të panjohura./lajmi.net/