Kryesia Qendrore e LDK-së i jep mbështetje të fuqishme Lumir Abdixhikut për udhëheqjen e proceseve politike e organizative të partisë

Lajme

09/07/2026 19:26

Kryesia Qendrore e Lidhjes Demokratike të Kosovës ka shprehur mbështetje të plotë për kryetarin Lumir Abdixhiku, duke i besuar vazhdimin e udhëheqjes së proceseve politike dhe organizative të partisë, si dhe angazhimin në bisedimet për formimin e institucioneve të reja të Kosovës.

Pas mbledhjes së mbajtur sot, LDK vlerësoi se rezultati i zgjedhjeve solli rritje për partinë, por theksoi se ai nuk i përmbushi objektivat politike të vendosura, transmeton lajmi.net.

“Kryesia Qendrore vlerëson se rezultati zgjedhor, ndonëse shënon rritje të LDK-së, nuk përmbush synimet dhe pritjet tona politike. Prandaj, përgjegjësia për të vazhduar punën, për të adresuar mangësitë dhe për ta shndërruar këtë rritje në besim edhe më të gjerë qytetar, është përgjegjësi e përbashkët e të gjitha niveleve drejtuese dhe organizative të partisë”, thuhet në njoftim.

Në të njëjtën kohë, Kryesia riafirmoi mbështetjen për Abdixhikun.

“Kryesia Qendrore shpreh mbështetjen e plotë për Kryetarin e LDK-së, z. Lumir Abdixhiku, në ushtrimin e mandatit për udhëheqjen e proceseve politike e organizative të partisë; si dhe procesin e formimit të institucioneve të Republikës nëpërmjet diskutimeve me partitë e tjera parlamentare”, theksohet në komunikatë.

Sa i përket zhvillimeve të brendshme, LDK bëri të qartë se zgjedhjet për strukturat drejtuese do të mbahen në afatet e parapara me Statut, duke theksuar se vendimmarrja duhet të zhvillohet përmes mekanizmave partiakë dhe në përputhje me vullnetin e anëtarësisë.

Në përfundim, Kryesia u bëri thirrje anëtarëve dhe strukturave të partisë të përqendrohen në forcimin e LDK-së dhe rritjen e besimit qytetar, duke theksuar se uniteti mbetet thelbësor për përmbushjen e objektivave politike të partisë.

Postimi i plotë:

1. Kryesia Qendrore vlerëson angazhimin e strukturave, kandidatëve, aktivistëve dhe të gjithë anëtarësisë së LDK-së gjatë procesit zgjedhor. Rritja e shënuar në një periudhë relativisht të shkurtër vlerësohet nga Kryesia e LDK-së. Njëkohësisht, Kryesia kërkon zhvillimin e analizave të thella në të gjitha nivelet, me qëllim të evidentimit të hapësirave për përmirësim dhe forcimit të mëtejmë të organizimit dhe veprimit politik.

2. Kryesia Qendrore vlerëson se rezultati zgjedhor, ndonëse shënon rritje të LDK-së, nuk përmbush synimet dhe pritjet tona politike. Prandaj, përgjegjësia për të vazhduar punën, për të adresuar mangësitë dhe për ta shndërruar këtë rritje në besim edhe më të gjerë qytetar, është përgjegjësi e përbashkët e të gjitha niveleve drejtuese dhe organizative të partisë.

3. Kryesia Qendrore shpreh mbështetjen e plotë për Kryetarin e LDK-së, z. Lumir Abdixhiku, në ushtrimin e mandatit për udhëheqjen e proceseve politike e organizative të partisë; si dhe procesin e formimit të institucioneve të Republikës nëpërmjet diskutimeve me partitë e tjera parlamentare.

4. LDK i ka institucionet, Statutin dhe mekanizmat e saj demokratikë. Kryesia mbështetë opinionin e Kolegjiumit të Degëve. Zgjedhjet e brendshme të LDK-së mbahen në afat të rregullt. Çdo çështje duhet të trajtohet në respekt të plotë të institucioneve partiake dhe të vullnetit të lirë të anëtarësisë. Kryesia Qendrore riafirmon se vendimmarrja demokratike dhe respektimi i shumicës mbeten parime të panegociueshme të organizimit tonë politik.

5. Kryesia Qendrore fton të gjithë anëtarët, veprimtarët dhe strukturat e LDK-së që energjinë dhe angazhimin e tyre ta drejtojnë drejt forcimit të partisë, rritjes së besimit qytetar dhe përmbushjes së përgjegjësive që vendi pret nga ne. Kosova ka nevojë për një LDK të bashkuar, të qëndrueshme dhe të përqendruar në ofrimin e alternativës së saj politike.

LDK është më e madhe se secili prej nesh. Përgjegjësia jonë e përbashkët është ta ruajmë të bashkuar, ta forcojmë dhe ta çojmë përpara, me besim në anëtarësinë tonë, me respekt për demokracinë dhe me përkushtim ndaj Republikës së Kosovës./lajmi.net/