Deputeti i zgjedhur i Lidhjes Demokratike të Kosovës (LDK), Armend Zemaj, ka konfirmuar se i është kërkuar nënshkrimi për iniciativën që synon thirrjen e Kuvendit të Jashtëzakonshëm të partisë, ku pritet të kërkohet edhe shkarkimi i kryetarit, Lumir Abdixhiku, raporton lajmi.net.

Megjithatë, Zemaj nuk ka treguar nëse e ka nënshkruar iniciativën, duke theksuar se qëndrimin e tij do ta bëjë të ditur vetëm pas mbledhjes së strukturave të LDK-së.

Ai tha se çështjet e brendshme të partisë duhet të diskutohen fillimisht brenda forumeve të saj, duke theksuar se çdo rezultat zgjedhor kërkon analizë dhe reflektim.

“Unë kisha kërkuar mirëkuptimin që, edhe në aspektin personal, por edhe në atë që përfaqësoj si pjesë e strukturave organizative të LDK-së, debati të zhvillohet brenda subjektit tim politik. Jemi të përkushtuar për ruajtjen e unitetit dhe çdo rezultat kërkon reflektim mbi shifrat, numrat dhe rezultatin që ka marrë subjekti politik”, deklaroi Zemaj.

I pyetur nëse po mblidhen nënshkrime për thirrjen e Kuvendit të Jashtëzakonshëm, ai konfirmoi se një iniciativë e tillë ekziston.

“Na jepni mundësinë që të bisedojmë brenda partisë. Nënshkrimet kërkohen për Kuvend të Jashtëzakonshëm, sepse ne kemi pasur një Kuvend të rregullt. Sigurisht që po”, u shpreh Zemaj.

Ai nuk tregoi nëse e ka mbështetur iniciativën me nënshkrimin e tij, duke lënë të kuptohet se për këtë do të flasë pas përfundimit të diskutimeve në organet e partisë. /Lajmi.net/