Argjentina dhe Egjipti do të përballen sonte në Atlanta në kuadër të fazës së 1/8 së finales së Kupës së Botës 2026, në një duel ku kampionët në fuqi konsiderohen favoritë të qartë për të siguruar kalimin në çerekfinale.

Skuadra e Lionel Scalonit vjen pas një fitoreje të vështirë 3:2 ndaj Kepit të Gjelbër, ndërsa deri më tani ka fituar të katër ndeshjet në këtë Botëror. Në qendër të vëmendjes mbetet Lionel Messi, i cili po zhvillon një turne të jashtëzakonshëm dhe pritet të jetë arma kryesore e Argjentinës edhe ndaj Egjiptit. Trajneri Scaloni, megjithatë, ka paralajmëruar se në këtë Botëror nuk ka favoritë absolutë, duke përmendur eliminimet e disa kombëtareve të mëdha si dëshmi të nivelit të lartë të konkurrencës.

Nga ana tjetër, Egjipti mbërrin në këtë sfidë me moral të lartë pasi eliminoi Australinë vetëm pas ekzekutimit të penalltive. Kombëtarja afrikane do të mbështetet te përvoja dhe cilësia e Mohamed Salah, i cili së bashku me Omar Marmoush pritet të udhëheqë repartin ofensiv në përpjekje për të befasuar kampionët e botës.

Parashikimet para ndeshjes favorizojnë Argjentinën për shkak të formës së mirë, përvojës në ndeshjet eliminatore dhe ndikimit të Messit, megjithëse Egjipti ka treguar se është një skuadër e organizuar dhe e aftë të rezistojë ndaj kundërshtarëve më të fortë. Fituesi i kësaj sfide do të sigurojë një vend në çerekfinale të Kupës së Botës 2026.

Formacionet e mundshme:

Argjentina (4-3-3): Emiliano Martínez; Nahuel Molina, Cristian Romero, Lisandro Martínez, Nicolás Tagliafico; Rodrigo De Paul, Enzo Fernández, Alexis Mac Allister; Julián Álvarez, Lionel Messi, Alejandro Garnacho.

Egjipti (4-2-3-1): Mostafa Shobier; Mohamed Hany, Yasser Ibrahim, Rami Rabia, Mohamed Hamdy; Hamdy Fathy, Marwan Attia; Omar Marmoush, Ahmed Sayed “Zizo”, Mahmoud Hassan “Trezeguet”; Mohamed Salah.