Dy persona janë arrestuar nga Policia e Kosovës nën dyshimin për kultivim të bimëve narkotike në zonën e Podujevës.

Sipas njoftimit të Policisë, njësitet e Drejtorisë për Hetimin e Trafikimit me Narkotikë (DHTN) në Prishtinë, pas veprimeve operative dhe hetimore, kanë realizuar më 6 korrik 2026 një plan taktik, gjatë të cilit kanë identifikuar dhe kapur në flagrancë dy të dyshuar, shtetas të Kosovës, teksa po kujdeseshin për një plantacion me 201 bimë të dyshuara të llojit Kanabis Sativa.

Me urdhër dhe në koordinim me prokurorin kompetent janë marrë mostra nga bimët për ekzaminim, ndërsa pjesa tjetër është asgjësuar në vendin e ngjarjes.

Policia ka kryer gjithashtu bastisje në shtëpitë e të dyshuarve. Gjatë kontrollit në njërën prej tyre është gjetur dhe sekuestruar një qese e vogël me 1.7 gramë substancë të dyshuar narkotike të llojit marihuanë.

Në vendin e ngjarjes janë fotografuar dhe konfiskuar provat materiale, ndërsa pas intervistimit, me vendim të prokurorit, të dyshuarit janë dërguar në mbajtje.

Rasti është duke u hetuar nga organet kompetente. /Lajmi.net/