Agjencia e Ushqimit dhe Veterinarisë (AUV) ka reaguar lidhur me rastin e qumështores “Vita”, duke bërë të ditur se gjatë një inspektimi të jashtëzakonshëm janë konstatuar mospërputhje me legjislacionin në fuqi, por se deri më tani nuk është marrë vendim për mbylljen e subjektit.

Sipas AUV-së, gjatë kontrollit janë marrë mostra të qumështit UHT, qumështit pluhur dhe vajit të palmës për analiza laboratorike, ndërsa janë verifikuar edhe dokumentacioni, objekti dhe linjat e prodhimit, transmeton lajmi.net.

Agjencia njofton se është konstatuar se operatori ka autorizim për përpunimin e qumështit, por në objekt janë instaluar edhe linja për prodhimin e produkteve me bazë qumështi duke përdorur qumësht pluhur, vaj palme dhe lëndë të tjera ndihmëse. Po ashtu, sipas AUV-së, subjekti nuk posedon autorizim të veçantë për prodhimin dhe përpunimin e produkteve me bazë yndyrash bimore dhe proteinash të qumështit për qëllimet e deklaruara në etiketim.

Megjithatë, Agjencia thekson se procedura ende nuk ka përfunduar.

“Inspektimi ka konsistuar vetëm në verifikim dhe marrje mostrash, ndërsa vlerësimi i plotë dhe konstatimet përfundimtare do të bëhen pas pranimit të rezultateve laboratorike, në përputhje me legjislacionin në fuqi”, thuhet në njoftim.

AUV bëri të ditur se pas përfundimit të inspektimit subjektit i është lënë vendim për zbatimin e kërkesave të legjislacionit në fuqi dhe udhëzimeve të Ministrisë së Bujqësisë.

Në fund, Agjencia ritheksoi se mbrojtja e shëndetit publik dhe siguria ushqimore mbeten prioritet, ndërsa veprimet e mëtejshme do të varen nga rezultatet e analizave laboratorike.

Komunikata e plotë: