Kryeministri në detyrë, Albin Kurti, ka bërë të ditur se sot ka pritur në Zyrën e Kryeministrit profesorin amerikan dhe njohësin e çështjeve të Ballkanit, Daniel Serwer, me të cilin zhvilloi një takim që e cilësoi si të përzemërt dhe frymëzues.

Përmes një postimi në Facebook, Kurti tha se ishte kënaqësi ta takonte sërish profesorin Serwer, duke theksuar se ai ishte mysafiri i parë amerikan të cilit ia uroi përvjetorin e 250-të të pavarësisë së Shteteve të Bashkuara të Amerikës.

Sipas Kurtit, gjatë takimit u diskutua për një gamë të gjerë temash me rëndësi për Kosovën, përfshirë situatën e brendshme politike, hapat që vendi po ndërmerr në kuadër të përgatitjeve për anëtarësim në Bashkimin Evropian dhe NATO, si dhe zhvillimet aktuale gjeopolitike dhe ndikimin e tyre në sigurinë e Kosovës.

Kryeministri në detyrë vlerësoi lart mbështetjen e vazhdueshme të profesorit Serwer ndaj Kosovës, duke e cilësuar atë si një mik të madh të vendit.

“Kosova është me fat që e ka një mik si Daniel Serwer, i cili kurrë nuk ka hezituar të flasë të vërtetën për popullin tonë dhe kërcënimet që paraqet Serbia ndaj sigurisë rajonale”, shkroi Kurti në postimin e tij. /Lajmi.net/