Konsumi i energjisë elektrike në Kosovë ka shënuar rritje gjatë muajit prill 2026, krahasuar me të njëjtën periudhë të vitit të kaluar.

Sipas të dhënave të publikuara nga Agjencia e Statistikave të Kosovës (ASK), konsumi i energjisë elektrike në prill arriti në 460.66 GWh, që paraqet rritje prej 5.58 për qind krahasuar me prillin e vitit 2025, përcjell KosovaPress.

Megjithatë, energjia elektrike bruto në dispozicion ishte 567.64 GWh, duke regjistruar një rënie të lehtë prej 0.07 për qind në raport me të njëjtin muaj të vitit paraprak, përcjell KosovaPress.

ASK bën të ditur se energjia elektrike alternative përbënte 16.36 për qind të konsumit të përgjithshëm të energjisë elektrike në vend.

Sa i përket shkëmbimeve energjetike, gjatë muajit prill 2026 Kosova importoi 335.29 GWh energji elektrike, ndërsa eksportoi 203.27 GWh, ku përfshihet edhe sasia e transmetimit.

Sipas ASK-së, prodhimi i thëngjillit për muajin prill 2026 ishte 826 993 mijë ton, që paraqet një rritje prej 20,70 % krahasuar me muajin e njëjtë të vitit të kaluar.

Këto të dhëna janë pjesë e publikimit mujor “Statistikat e Energjisë”, i cili paraqet tregues mbi prodhimin, konsumin, importin dhe eksportin e energjisë në Kosovë.