Kandidati për deputet nga radhët e PDK-së, Eman Rrahmani, ka reaguar pas ekzekutimit të mbështetjes prej 100 eurosh për punëtorët e sektorit privat, duke vlerësuar se kjo shumë nuk mjafton për të përballuar rritjen e kostos së jetesës.

Përmes një postimi publik, Rrahmani tha se një pjesë e konsiderueshme e kësaj shume do të shpenzohet menjëherë për shërbime dhe nevoja bazike të qytetarëve.

“Nga 100 euro që i keni marrë sot, 20 euro duhet t’ia paguani Valës nëse dëshironi ta shikoni kampionatin”, ka shkruar ai.

Rrahmani u bëri thirrje qytetarëve të krahasojnë faturat dhe shpenzimet aktuale me ato të një viti më parë, duke përmendur rritjen e kostove për energjinë elektrike, ujin, mbeturinat dhe karburantet.

“Shikojeni faturën e rrymës, të ujit, të mbeturinave dhe shpenzimet e naftës në krahasim me një vit më parë. Nuk po i llogarisim fare çmimet e bukës, vajit, qumështit, sheqerit dhe produkteve të tjera”, është shprehur ai.

Deklarata e tij vjen në kohën kur vazhdon debati publik rreth ndikimit të masave mbështetëse dhe fuqisë blerëse të qytetarëve përballë rritjes së çmimeve në treg. /Lajmi.net/