Kandidatja për deputete nga radhët e LDK-së, Jeta Statovci, po përballet me një rezultat dukshëm më të ulët në zgjedhjet e 7 qershorit, krahasuar me zgjedhjet e mëparshme të 28 dhjetorit 2025.

Në zgjedhjet e kaluara, Statovci, e cila garonte në kuadër të listës së përbashkët GUXO në koalicion me Lëvizjen Vetëvendosje, kishte arritur të siguronte mbi 37 mijë e 916 vota, duke u renditur ndër deputetet më të votuara, në pozitën e 22-të.

Ndërsa në zgjedhjet e fundit, pas shkëputjes nga GUXO dhe Lëvizja Vetëvendosje dhe kalimit në listën e lidhur me Lidhjen Demokratike të Kosovës, ajo ka marrë deri tani 11 mijë e 672 vota, me rreth 90% të votave të numëruara.

Ky ndryshim i madh në përkrahje elektorale e vendos Statovcin në një garë të ngushtë për të siguruar rikthimin në Kuvendin e Kosovës, pasi rezultatet aktuale tregojnë një rënie të konsiderueshme të votave në raport me ciklin e kaluar zgjedhor.

Sipas të dhënave të deritanishme nga procesi i numërimit, mbetet ende e paqartë nëse ajo do të arrijë të sigurojë një ulëse në legjislaturën e ardhshme, ndërsa përfundimi i numërimit pritet të përcaktojë përbërjen finale të Kuvendit. /Lajmi.net/