Kosova ka vazhduar të forcojë pozitën e saj si destinacion turistik gjatë vitit 2025, duke regjistruar rritje të numrit të vizitorëve dhe net-qëndrimeve në krahasim me vitin paraprak.

Sipas të dhënave të publikuara nga Agjencia e Statistikave të Kosovës (ASK) në kuadër të hulumtimit për Hotelerinë dhe Turizmin, gjatë vitit të kaluar në hotele dhe objekte të tjera akomoduese janë regjistruar gjithsej 762,836 vizitorë.

Nga ky numër, 39.3 për qind kanë qenë vizitorë vendorë, ndërsa 60.7 për qind vizitorë të huaj, duke treguar interesim gjithnjë e më të madh të turistëve ndërkombëtarë për Kosovën.

Po ashtu, gjatë vitit 2025 janë realizuar 1,653,390 net-qëndrime në objektet akomoduese të vendit. Sipas statistikave, 45.4 për qind e tyre janë realizuar nga vizitorët vendorë, ndërsa 54.6 për qind nga turistët e huaj.

Të dhënat tregojnë se edhe turizmi vendor ka vazhduar trendin pozitiv. Krahasuar me vitin 2024, numri i vizitorëve vendorë është rritur për 9.1 për qind, ndërsa net-qëndrimet e tyre janë rritur për 8 për qind.

Rritje është regjistruar edhe te turistët e huaj. Gjatë vitit 2025, Kosova ka mirëpritur 463,092 vizitorë ndërkombëtarë, ose 9.4 për qind më shumë se një vit më parë.

Sipas ASK-së, pjesa më e madhe e turistëve të huaj kanë ardhur nga Shqipëria, Gjermania, Zvicra dhe Turqia, shtete që vazhdojnë të kryesojnë listën e vizitorëve ndërkombëtarë në Kosovë.

Ndërkohë, gjatë vitit të kaluar, 639,945 qytetarë kanë realizuar të paktën një udhëtim me net-qëndrim brenda ose jashtë Kosovës, duke reflektuar një rritje të lëvizshmërisë së popullsisë.

Një tjetër tregues i rëndësishëm i zhvillimit të turizmit mbetet edhe numri i hyrjeve të shtetasve të huaj në territorin e Kosovës. Sipas statistikave kufitare, gjatë periudhës janar-dhjetor 2025 janë regjistruar 7,465,625 hyrje të shtetasve të huaj, shifër që dëshmon për qarkullimin e lartë të vizitorëve dhe rëndësinë në rritje të Kosovës si destinacion për turizëm, biznes dhe vizita familjare.

Shifrat e vitit 2025 konfirmojnë trendin pozitiv të sektorit të turizmit, i cili po vazhdon të japë kontribut të rëndësishëm në ekonominë dhe promovimin ndërkombëtar të Kosovës. /Lajmi.net/