BE: Kosova duhet të përshpejtojë reformat për zhvillimin e sektorit privat dhe biznesit
Bashkimi Evropian ka theksuar rëndësinë e ndërmarrjeve të vogla dhe të mesme (NVM) si shtytëse kryesore të rritjes ekonomike, inovacionit dhe krijimit të vendeve të punës në Kosovë dhe në gjithë Ballkanin Perëndimor. Kjo u theksua gjatë prezantimit të analizës së Indeksit të Politikave për NVM-të, një instrument i zhvilluar nga OECD në bashkëpunim me…
Lajme
Bashkimi Evropian ka theksuar rëndësinë e ndërmarrjeve të vogla dhe të mesme (NVM) si shtytëse kryesore të rritjes ekonomike, inovacionit dhe krijimit të vendeve të punës në Kosovë dhe në gjithë Ballkanin Perëndimor.
Kjo u theksua gjatë prezantimit të analizës së Indeksit të Politikave për NVM-të, një instrument i zhvilluar nga OECD në bashkëpunim me Komisionin Evropian, që synon të ndihmojë vendet e rajonit në hartimin e politikave dhe strategjive të bazuara në dëshmi për zhvillimin e sektorit privat, transmeton lajmi.net.
Shefja në detyrë e Zyrës së BE-së në Kosovë, Eva Palatova, tha se në kuadër të Planit për Rritje të Bashkimit Evropian, Kosova ka paraqitur një agjendë ambicioze reformash në fushën e zhvillimit të sektorit privat dhe mjedisit të biznesit.
Sipas saj, agjenda përfshin shtatë reforma themelore dhe 26 hapa konkretë që synojnë promovimin e investimeve, rritjen e eksporteve dhe krijimin e një kornize rregullatore më efektive, me qëllim nxitjen e inovacionit dhe zhvillimit të qëndrueshëm ekonomik.
“Ky proces duhet të ndiqet nga një përshpejtim substancial i ritmit të reformave”, ka deklaruar Palatova.
Nga Zyra e BE-së është bërë e ditur se Bashkimi Evropian mbetet partneri më i madh financiar i Kosovës, me rreth 3.7 miliardë euro të investuara që nga viti 1999. Sipas të dhënave të prezantuara, rreth 60 për qind e investimeve të huaja direkte në Kosovë vijnë nga vendet e BE-së.
Ngjarja shërbeu si platformë për diskutime mbi mënyrat se si Kosova mund t’i harmonizojë më tej politikat për NVM-të me standardet dhe praktikat më të mira të Bashkimit Evropian dhe OECD-së, me synimin që bizneset vendore të bëhen më konkurruese, më rezistente ndaj sfidave dhe më të përgatitura për mundësitë e ardhshme ekonomike.
BE-së, NVM-të dhe ndërmarrësit janë nxitësit kryesorë të rritjes gjithëpërfshirëse dhe të qëndrueshme, inovacionit dhe krijimit të vendeve të punës në Kosovë dhe në mbarë Ballkanin Perëndimor.
