Belgjika ka përcjellë një mesazh të qartë dhe të drejtpërdrejtë për skenën politike në Kosovë. Përmes një reagimi publik në platformën X, zëvendëskryeministri dhe shefi i diplomacisë belge, Maxime Prevot, u kërkoi liderëve politikë që të respektojnë vullnetin e qytetarëve të shprehur në zgjedhje dhe të punojnë për tejkalimin e bllokadës politike.

“Kosova votoi. Tani u takon liderëve politikë ta respektojnë këtë zgjedhje duke punuar së bashku dhe duke i dhënë fund bllokadës aktuale politike. Asnjë parti nuk mund të qeverisë e vetme. Ndërtimi i një koalicioni dhe formimi i shpejtë i institucioneve të qëndrueshme duhet të jenë prioritet”, shkroi ai.

Prevot theksoi se e ardhmja e Kosovës lidhet ngushtë me avancimin e agjendës evropiane, duke nënvizuar nevojën për riangazhim në dialogun ndërmjet Beograd dhe Prishtinë, si dhe vazhdimin e reformave që do ta afrojnë vendin me Bashkimi Evropian, shkruan lajmi.net.

“Rruga përpara është e qartë: avancimi në rrugëtimin evropian të Kosovës, riangazhimi në dialogun Beograd–Prishtinë dhe vazhdimi i reformave që do ta afrojnë Kosovën me Bashkimin Evropian”, deklaroi ai.

Në fund të mesazhit të tij, diplomati belg rikonfirmoi mbështetjen e vazhdueshme të Belgjikës për aspiratat evropiane të Kosovës, duke theksuar se Belgjika mbetet një partnere dhe mbështetëse e palëkundur e perspektivës evropiane të vendit. /Lajmi.net/

🇽🇰 Kosova has voted. Now it is up to political leaders to honour that choice by working together and end the current political deadlock. No party can govern alone. Building a coalition and forming stable institutions quickly should be the priority.

The path ahead is clear:…

— Maxime PREVOT (@prevotmaxime) June 8, 2026