Ushtruesi i detyrës së Kryeprokurorit të Shtetit, Agron Qalaj, ka vizituar dhomën operative për monitorimin e procesit zgjedhor në Zyrën e Kryeprokurorit të Shtetit në Prishtinë.

Ai është pritur nga Koordinatorja Nacionale për Zgjedhje, prokurorja Laura Pula, me të cilën është njoftuar nga afër për punën dhe funksionimin e kësaj dhome gjatë ditës së zgjedhjeve.

Gjatë vizitës, Qalaj ka parë nga afër angazhimin e stafit të dhomës operative, e cila është përgjegjëse për monitorimin e situatës dhe mbrojtjen e votës së lirë të qytetarëve, si dhe për sigurimin e integritetit të procesit zgjedhor.

Ai ka falënderuar dhe inkurajuar koordinatoren Pula dhe ekipin e angazhuar për punën që po bëjnë në funksion të mbarëvajtjes së zgjedhjeve dhe respektimit të ligjshmërisë.

Në dhomën operative për monitorimin e procesit zgjedhor po qëndron edhe një zyrtar i Misionit të Bashkimit Evropian për Sundim të Ligjit në Kosovë (EULEX), i cili po përcjell rastet penale që mund të ndërlidhen me procesin zgjedhor gjatë ditës. /Lajmi.net/