Kryetari i Organizatës së Veteranëve të Luftës së UÇK-së, Hysni Gucati, ka bërë publik një kërcënim që thotë se e ka marrë në rrjetet sociale, duke theksuar se heshtja përballë gjuhës së urrejtjes dhe thirrjeve për dhunë nuk mund të tolerohet.

Sipas Gucatit, një komentues me emrin Eqerem Avdullahu ka shkruar në një postim të tij shprehjen “Ky derr duhet pushkatu”, të cilën ai e ka cilësuar si gjuhë linçuese dhe thirrje të papranueshme për dhunë.

Reagimi i Gucatit vjen në një datë që për të ka simbolikë të veçantë. Ai ka kujtuar se më 3 qershor bëhen 27 vjet nga plagosja e tij në Malet e Berishës gjatë luftës çlirimtare.

“Shenjat në trupin tim janë dëshmitare të asaj kohe kur vendosej fati i atdheut, ashtu siç ishte edhe përballja ime me dinjitet në Hagë për të mbrojtur pastërtinë e Luftës Çlirimtare”, ka shkruar ai.

Gucati ka theksuar se është e lehtë të bëhen kërcënime nga pas ekranit në kohë lirie, duke rikujtuar se liria është fituar me sakrifica të mëdha.

“Është e lehtë të kërkosh ‘pushkatime’ virtuale sot në liri, një liri që u pagua me gjak e sakrifica. Unë mbetem ai që kam qenë gjithmonë, me ballin lart, i palëkundur dhe krenar për rrugën që kemi kaluar”, ka deklaruar Gucati. /Lajmi.net/