Prokuroria Themelore në Prizren ka kërkuar caktimin e masës së paraburgimit prej 30 ditësh ndaj të dyshuarit me inicialet E.J., në kuadër të hetimeve për rastin e njohur si “Pronat në Prizren”, ku dyshohet për keqpërdorim të pozitës zyrtare dhe manipulim me prona në vlerë rreth një milion euro.

Sipas komunikatës së prokurorisë, E.J., në cilësinë e një ndërmjetësuesi të licencuar, dyshohet se ka tejkaluar kompetencat duke përpiluar dokumente dhe marrëveshje fiktive ndërmjetësimi, me qëllim të përfitimit material për vete ose persona të tjerë.

Hetimet disa mujore, të zhvilluara në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsionit, kanë zbuluar se përmes dokumenteve dhe procedurave të dyshuara si fiktive janë bartur 18 parcela tokësore në fshatin Lokvicë të Prizrenit, prona që i përkisnin një personi të ndjerë prej dekadash.

Sipas prokurorisë, përmes këtyre veprimeve është shkaktuar dëm material i konsiderueshëm ndaj pronarëve ligjorë, ndërsa vlera e pronave të përfshira arrin rreth 1 milion euro.

Në këtë rast, hetimet po vazhdojnë edhe ndaj të dyshuarit tjetër me inicialet V.Z., i cili ndodhet në arrati dhe dyshohet për veprat penale “Falsifikimi i dokumenteve” dhe “Legalizimi i përmbajtjes së rreme”. Sipas dyshimeve, ai në koordinim me E.J. ka bartur në emër të tij 18 ngastra kadastrale përmes dokumenteve të falsifikuara.

Po ashtu, nën hetime është edhe i dyshuari A.G., për veprën penale “Keqpërdorimi i pozitës apo autoritetit zyrtar”.

Gjatë aksionit janë sekuestruar 14 mijë e 600 euro para të gatshme, telefona dhe dokumente relevante për rastin, ndërsa prokuroria ka lëshuar urdhër për ngrirjen e përkohshme të 18 parcelave të paluajtshme deri në përfundim të procedurës hetimore.

Prokuroria ka bërë të ditur se hetimet po vazhdojnë për identifikimin e personave të tjerë të përfshirë dhe sigurimin e provave shtesë. /Lajmi.net/