Një 27-vjeçar ka pësuar lëndime të rënda trupore pasi ka rënë nga kulmi i një objekti në fshatin Babush, përgjatë magjistrales Ferizaj-Prishtinë.

Rastin për lajmi.net e ka konfirmuar zëdhënësi i Policisë së Kosovës për rajonin e Ferizajt, Kanun Veseli, i cili bëri të ditur se ngjarja ka ndodhur më 20 maj 2026, rreth orës 15:40, kur autoritetet kanë pranuar informatën se një person kishte rënë nga pullazi i një objekti dhe si pasojë kishte pësuar lëndime trupore, shkruan lajmi.net.

Menjëherë pas pranimit të informacionit, në vendin e ngjarjes kanë dalë njësitë policore, të cilat kanë siguruar lokacionin, ndërsa i lënduari fillimisht është dërguar në Emergjencën e Ferizajt. Për shkak të gjendjes së rëndë shëndetësore dhe natyrës së lëndimeve, ai më pas është transferuar në Qendrën Klinike Universitare të Kosovës në Prishtinë për trajtim të mëtejmë mjekësor.

“Në vendin e ngjarjes kanë dalë edhe hetuesit policorë, të cilët po merren me ekzaminimin e rrethanave të incidentit, si dhe inspektorët e punës.Menjëherë në vendin e ngjarjes është angazhuar një patrullë policore, e cila ka siguruar lokacionin, ndërsa personi i lënduar ishte transportuar fillimisht në Emergjencën e Ferizajt, e më pas, për shkak të lëndimeve të rënda trupore, i lënduari, një mashkull 27 vjeçar është dërguar për trajtim të mëtejmë në QKUK në Prishtinë”, ka deklaruar Veseli.

Ndërkaq lidhur me rastin është njoftuar prokurori i shtetit, ndërsa rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”. /Lajmi.net/