Arsenal është vetëm dy fitore larg shpalljes kampion i Premier League për herë të parë pas më shumë se 20 vjetësh. Skuadra e drejtuar nga Mikel Arteta pret në “Emirates Stadium” ekipin e Burnleyt, në një ndeshje ku londinezët synojnë të bëjnë detyrën dhe të mbajnë gjallë ëndrrën për titull.

Pas fitores kontroverse 1:0 ndaj West Ham United në javën e kaluar, Arsenali shpresonte ta siguronte matematikisht titullin këtë fundjavë, por fitorja e Manchester City në mesjavë e shtyu festën e mundshme. Megjithatë, një triumf ndaj Burnleyt dhe një hap fals i Cityt ndaj Bournemouthit do t’i kurorëzonte “Topçinjtë” kampionë të Anglisë.

Statistikat janë dukshëm në anën e Arsenalit. Londinezët janë të pamposhtur në 44 ndeshje si vendas ndaj skuadrave të promovuara në elitë, me 39 fitore dhe pesë barazime, ndërsa kanë fituar 15 përballjet e fundit të tilla. Po ashtu, Arsenali ka triumfuar në ndeshjen e fundit kampionale në shtëpi në 23 nga 28 sezonet e fundit.

Në anën tjetër, Burnley tashmë e ka të konfirmuar rënien nga Premier League dhe sezonin e ardhshëm do të luajë në Championship. Ekipi ka vetëm një fitore në 27 ndeshjet e fundit kampionale dhe synimi i vetëm mbetet shmangia e vendit të fundit në tabelë.

Historia e përballjeve direkte gjithashtu favorizon Arsenalin. Burnley ka fituar vetëm një herë ndaj londinezëve në Premier League, ndërsa në 19 përballje ka regjistruar katër barazime dhe 14 humbje.